Framleiðsluárið · Vigtun · Leiðbeining 15

Svona vigtar þú

Þú skannar gripinn, slærð inn þungann, vistar og heldur beint áfram með næsta. Í lokin sendir þú allt í Fjárvís í einu: skanna, skrá, senda. Myndirnar eru úr appinu sjálfu.

1SkannaGripinn. Appið velur rétta þungategund. 2SkráÞungann, vista og halda áfram. 3SendaAllar vigtanirnar í Fjárvís í einu.

Fyrir vigtunardaginn

Áður en þú byrjar

Samstilltu búið við Fjárvís, svo allir gripir og fyrri vigtanir séu í appinu. Sjá leiðbeiningu 8.

Tengdu örmerkjalesarann og prófaðu eitt merki. Sjá leiðbeiningu 6.

Vigtarðu með vog sem vistar í lesarann? Þá geturðu lesið skrána inn í einu lagi, sjá neðar.

Lélegt net í réttinni? Ekkert mál, vigtanirnar vistast í símanum. Sjá leiðbeiningu 9.

1

Skanna

1. Á Heim, ýttu á Vigtun. Talan á spjaldinu er fjöldi vigtana sem bíða sendingar.
2. Listinn Þungavigtun opnast. Ýttu á „Skrá“ til að byrja.
3. Skannaðu gripinn. Hann er valinn og appið stingur upp á réttri þungategund eftir því hvort þetta er lamb eða fullorðinn gripur og hvaða dagur er.

Ekki með lesara? Skrifaðu nokkra stafi úr nafni, valnúmeri eða lambanúmeri í leitarreitinn og veldu úr listanum. Í haust-, miðsvetrar- og vorvigtun leitar reiturinn bara í valnúmerum, og í lambategundunum bara í lambanúmerum.

Listinn yfir vigtanir

Gripur valinn

Gott að skilja

Þegar þú velur gripinn

Um leið og gripurinn er skannaður birtast upplýsingar um hann:

• Nafn, valnúmer, kyn og eyrnamerki.
• Arfgerð: lituðu merkin, í sömu litum og með sömu heitum og í Fjárvís. Ýttu á merki til að sjá skýringu.
• Atburður: ef lamb er merkt líflamb eða til förgunar næsta haust sérðu það strax. Gott í haustvigtun.
• Upplýsingar um gripinn: faðir, móðir, fóstra, síðasta vigtun, gerð, fita, frjósemi og mjólkurgeta.
• Síðast skráð: síðasta vigtun, svo þú sérð strax hvort talan sé trúverðug.
• Fyrri athugasemdir.

Gott að skilja

Þungategund og lásinn á dagsetningunni

Þungategundin efst er valin sjálfkrafa. Þú getur breytt henni, t.d. ef þú skráir lífþunga lamba í september. Lambategundirnar er bara hægt að skrá á lömb.

Dagsetningin er dagurinn í dag. Við hana er lás. Opinn lás (sjálfgefið): dagsetningin fer aftur á daginn í dag eftir hverja vistun. Lokaður lás: hún heldur sér. Læstu henni þegar þú skráir vigtun frá öðrum degi, t.d. af blaði.

---

2

Skrá

1. Sláðu inn þungann. Undir tölunni stendur „Gilt bil: …“ fyrir tegundina. Tala utan bilsins vistast ekki.
2. Skrifaðu athugasemd ef þarf.
3. Ýttu á „Vista þunga“.
4. Skjárinn fer ekki til baka. Græn ræma segir „Síðast vistað: …“ og teljarinn efst hækkar. Skannaðu næsta grip strax.

Fjárvís geymir heilar tölur. Allir þungar nema fæðingarþungi eru námundaðir að heilu kílói þegar þeir fara í Fjárvís. Appið segir frá því um leið og þú slærð inn aukastaf.

„Þungi er þegar skráður“? Gripurinn er þegar með vigtun þennan dag. Glugginn sýnir gamla og nýja gildið. „Skipta út“ setur nýja þungann í staðinn. Tvær vigtanir á sama grip sama dag eru ekki leyfðar.

Þungi sleginn inn

Vistað, tilbúið fyrir næsta

Á haustin

Fallþungamat: á lambið að fara núna?

Þegar þú skráir lífþunga lamba birtist áætlaður fallþungi og hve líklegt er að fallið lendi undir 13,5 kg, mörkunum þar sem sláturhúsin greiða ekkert álag.

• Óhætt að senda.
• Á mörkunum: íhugaðu að bíða.
• Fær líklega ekkert álag.

Matið er „miðað við þitt bú“ þegar nóg er til af þínum eigin lömbum, annars landsmeðaltal. Það er upplýsing, ekki skilyrði. Þú vistar eins og venjulega.

Lamb á mörkunum

Gott að skilja

Athugasemdir

Reiturinn „Bættu við athugasemdum...“ er valfrjáls og hreinsast eftir hverja vistun. Athugasemdirnar eru geymdar í LAMB og fylgja gripnum. Þær birtast sem Fyrri athugasemdir næst þegar hann er valinn, t.d. í fangi eða burði.

---

3

Senda

Vigtanirnar fara ekki sjálfar í Fjárvís. Þegar þú ert búin/n sendir þú allt í einu.

1. Komdu símanum á net og farðu til baka í listann Þungavigtun.
2. Neðst stendur hve margar vigtanir bíða sendingar til Fjárvís. Ýttu á „Fjárvís“.
3. Fyrsta skiptið gætirðu þurft að skrá þig inn í Fjárvís.
4. Svo kemur yfirlitið „Sending til Fjárvís“: hve margar fóru á skrá, hve margar voru þegar þar og hverju var hafnað, með ástæðu.

Það sem er farið í Fjárvís er endanlegt í LAMB. Sendri vigtun er hvorki hægt að breyta né eyða í appinu.

Þú getur líka sent af vefnum: Vigtunarlisti → Ósent → „Senda á Fjárvís“.

Vigtanir sem bíða sendingar

Mörg hundruð í einu

Lesa inn skrá úr lesara eða vog

Vigtarðu með vog eða lesara sem vistar lotuna, t.d. Tru-Test, Gallagher eða Allflex? Þá skráir þú allar vigtanirnar í einu.

1. Sæktu skrána úr lesaranum í símann (CSV, TXT eða XLSX).
2. Í listanum Þungavigtun, ýttu á táknið „Flytja inn lesaraskrá“ efst og veldu skrána.
3. Appið parar merkin við gripi og sýnir hve mörg fundust og hver ekki.
4. Veldu tegund vigtunar (sjálfvirkt er oftast rétt) og skráningardag.
5. Ýttu á „Skrá … þunga“. Svo sendir þú í Fjárvís eins og venjulega.

Línur sem Fjárvís myndi hafna, t.d. undir lágmarki eða utan vigtunartímabils, er sleppt og sagt frá þeim. Gripir sem eru þegar með vigtun þann dag: þú velur Skipta út eða Sleppa.

Til að fletta upp

Þungategundir

Þungategund	Gilt bil	Fyrir
Fæðingarþungi lamba	1–10 kg	Lömb
Lífþungi lamba	15–140 kg	Lömb
Haustþungi	15–150 kg	Fullorðnir, 1. sept. – 20. des.
Miðsvetrarvigtun	15–150 kg	Fullorðnir, 21. des. – 28. feb.
Vorvigtun	15–150 kg	Fullorðnir, mars – ágúst

Ef eitthvað stoppar þig

Skilaboð sem geta birst

„Þungi verður að vera að minnsta kosti …“ / „má ekki fara yfir …“

Talan er utan gilda bilsins. Athugaðu töluna og þungategundina.

„Þungategundina … er aðeins hægt að skrá fyrir lömb“

Þú valdir lambategund á fullorðinn grip. Veldu aðra tegund, eða lamb.

„Fjárvís hefur ekki opnað framleiðsluárið …“

RML opnar árið. Vigtanirnar bíða og fara sjálfkrafa þegar það opnast. Ekkert að gera.

„… vigtanir eru enn ósendar úr símanum“

Síminn hefur ekki klárað að senda upp í LAMB. Athugaðu netið og reyndu aftur.

„Vistaðist ekki“

LAMB tók ekki við vigtuninni, t.d. af því að gripurinn var þegar vigtaður þann dag í öðrum síma. Línan segir af hverju. Sjá leiðbeiningu 9.

„Náði ekki sambandi við Fjárvís“

Sambandsleysi, ekki höfnun. Reyndu aftur síðar.

Þarftu aðstoð?

Tölvupósturinfo@lambehf.com

Sími+354 611-0469

Leiðbeiningarwiki.lambehf.com