Þungavigtun¶

Skref fyrir skref, frá stýriborðinu að vigtun sem er komin á skrá. Myndirnar eru úr appinu sjálfu — sama útlit og þú sérð í símanum.

Virkar á báðum svæðum

Sjálf vigtunarskráningin er eins á Íslandi og í Danmörku. Sending til Fjárvís (skref 7) á aðeins við um Ísland.

1 · Opnaðu vigtun af stýriborðinu¶

Ýttu á „Vigtun"-spjaldið á stýriborðinu. Talan á spjaldinu er fjöldi vigtana sem bíða sendingar — ekki öll vigtunarsaga búsins.

Stýriborðið með Vigtun-spjaldinu

Hin leiðin inn

Af gripaspjaldi opnast vigtunarsaga þess grips, með línuritinu „Þungaþróun" ef fleiri en ein færsla er til, og hnöppum til að flytja út CSV/Excel eða senda í tölvupósti. Það er uppflettingin; skrefin hér að neðan eru skráningin.

2 · Listinn yfir vigtanir sem bíða¶

Hér eru vigtanir sem skráðar hafa verið í appinu og eru ekki komnar á skrá hjá Fjárvís — nýjastar efst. Ýttu á „Skrá þyngd" til að bæta við.

Listi yfir vigtanir sem bíða sendingar

3 · Skráningarformið¶

Formið opnast með þungategund og dagsetningu þegar útfylltri. Dagsetningin er dagurinn í dag; smelltu á dagatalstáknið til að velja annan dag (ekki er hægt að velja fram í tímann né aftar en 2020).

Autt skráningarform

4 · Veldu gripinn¶

Sláðu inn nokkra stafi úr nafni, númeri eða eyrnamerki — listi með tillögum opnast undir reitnum. Þetta er leitarreitur, ekki fullur listi: hjá búi með hundruð gripa er fljótlegra að slá inn þrjá stafi en að skruna.

Með örmerkjalesara

Sé lesari tengdur (sjá Tengja örmerkjalesara við appið) velur skönnun gripinn sjálfkrafa og stingur upp á réttri þungategund. Finnist enginn gripur birtist „Enginn gripur fannst með merki: {merki}."

5 · Sláðu inn þungann¶

Þungi er sleginn inn á lyklaborði símans. Undir tölunni stendur „Gilt bil: {min}-{max} kg" fyrir valda tegund — sé talan utan bilsins vistast færslan ekki.

Gripur valinn og þungi sleginn inn

Fjárvís geymir heilar tölur

Fyrir allar tegundir nema fæðingarþunga er þunginn námundaður að heilu kílói þegar hann fer í Fjárvís. Appið segir frá því undir tölunni um leið og þú slærð inn aukastaf.

6 · Vistaðu — og haltu áfram með næsta grip¶

Ýttu á „Vista þunga". Skjárinn fer ekki til baka: reitirnir tæmast, græn ræma birtist með „Síðast vistað: {gripur} - {þungi} kg" og teljarinn í efstu rönd hækkar („1 vistað"). Veldu eða skannaðu næsta grip beint áfram — þannig gengur heil vigtunarlota án þess að fara fram og til baka.

Vigtun vistuð, formið tilbúið fyrir næsta grip

Ef þyngd er þegar skráð sama dag

Þá kemur glugginn „Þungi er þegar skráður" með gamla og nýja gildinu hlið við hlið. Veljir þú „Skipta út" er eldri færslan eydd og sú nýja vistuð í staðinn — tvær færslur á sama grip sama dag eru ekki mögulegar.

7 · Sendu í Fjárvís¶

Farðu til baka í listann. Vigtanirnar sem þú skráðir bíða þar, og neðst stendur hve margar „{fjöldi} vigtanir bíða sendingar til Fjárvís". Ýttu á „Senda til Fjárvís".

Vigtanir sem bíða sendingar, með Senda-hnappinum

Appið sendir allar vigtanir búsins sem bíða — ekki bara þá síðustu — og sýnir svo yfirlit: hve margar fóru á skrá, hve margar voru þegar á skrá og hverjum Fjárvís tók ekki við, með ástæðunni fyrir hverja um sig.

Það sem getur stöðvað sendingu

„Fjárvís hefur ekki opnað framleiðsluárið {ár}" — RML opnar árið; vigtanirnar bíða og fara sjálfkrafa þegar það opnast. Ekkert að gera.
„{fjöldi} vigtanir eru enn ósendar úr símanum" — skráningarnar eru ekki komnar upp í gagnagrunninn og færu því ekki með. Athugaðu netsambandið og reyndu aftur.
„Náði ekki sambandi við Fjárvís" — sambandsleysi, ekki höfnun. Reyndu síðar.

Í fyrsta sinn sem sent er af búi sem var tengt áður en persónunúmer var skráð biður appið um eina Fjárvís-innskráningu. Eftir það man það hver skráir.

Þungategundir¶

Þungategund	Gilt bil	Aðeins fyrir
Fæðingarþungi lamba	1–10 kg	Lömb
Lífþungi lamba	15–140 kg	Lömb
Haustþungi	15–150 kg	1. sept. – 20. des.
Miðsvetrarvigtun	15–150 kg	21. des. – 28. feb.
Vorvigtun	15–150 kg	Annars (mars–ágúst)

Appið velur tegundina eftir grip og dagsetningu þegar gripurinn er valinn. Lambategundirnar tvær eru læstar við lömb: veljir þú þær fyrir fullorðinn grip birtist „Þungategundina {tegund} er aðeins hægt að skrá fyrir lömb. Veldu lamb eða aðra þungategund."

Villuskilaboð sem geta birst¶

Skilaboð	Ástæða
„Þungi verður að vera að minnsta kosti {min} kg"	Innsleginn þungi er undir leyfðu lágmarki
„Þungi má ekki fara yfir {max} kg"	Innsleginn þungi er yfir leyfðu hámarki
„Vinsamlegast veldu grip"	Reynt að vista án þess að velja grip
„Þungategundina … er aðeins hægt að skrá fyrir lömb"	Lambategund valin fyrir fullorðinn grip
„Engin bújörð valin"	Engin bújörð valin á tækinu

Sjá einnig Tengja örmerkjalesara við appið og Gripaleit.