Framleiðsluárið · Sauðburður · Leiðbeining 14
Svona skráir þú burð
Þú skannar ána, skráir burðinn og svo hvert lamb, og sendir allt í Fjárvís í einu. Sama flæði og í fangi og þungavigtun: skanna, skrá, senda.
Fyrir sauðburð
Áður en þú byrjar
Skanna ána
- Á Heim, ýttu á Burðaskráning og svo +. Skjárinn Skrá burð opnast.
- Athugaðu dagsetninguna. Sjá um lásinn hér að neðan.
- Skannaðu ána. Hún fer í reitinn Ær og upplýsingar um hana birtast.
Ekki með lesara? Leitaðu að ánni eftir valnúmeri eða nafni. Hrútinn getur þú líka valið eða skannað sjálf/ur.
Gott að skilja
Þegar þú velur ána
Um leið og ærin er skönnuð birtast upplýsingar um hana, svo þú sérð strax að þú ert með réttan grip.
- Nafn og valnúmer, kyn og eyrnamerki.
- Arfgerð: lituðu merkin, í sömu litum og með sömu heitum og í Fjárvís. Ýttu á merki til að sjá skýringu.
- Upplýsingar um gripinn: faðir, móðir, fóstra, síðasta vigtun, gerð, fita, frjósemi og mjólkurgeta.
- Fyrri athugasemdir, t.d. frá fangi eða haustvigtun.
Eyrnamerki: 937000004084451
Sædd
Gott að skilja
Lásinn á dagsetningunni
Opinn lás (sjálfgefið): eftir hvern burð fer dagsetningin aftur á daginn í dag. Lokaður lás: dagsetningin heldur sér. Læstu henni þegar þú skráir burði frá öðrum degi, t.d. ef þú skráir af blaði eftir á.
Skrá burðinn
- Veldu Niðurstöðu burðar. Oftast 1 - Ærin hélt.
- Athugaðu Fjölda lamba. Breyttu með − og +.
- Skrifaðu athugasemd ef þarf, t.d. „erfiður burður“ eða „hjálpað“.
- Ýttu á „Skrá lamb 1“. Burðurinn vistast og skráning fyrsta lambsins opnast.
Skrá lömbin, eitt í einu
- Skannaðu merki lambsins. Ef merkið var tekið frá fyllist lambsnúmerið líka sjálft.
- Veldu kyn: Hrútur, Gimbrarlamb, Óþekkt eða Viðrini.
- Bættu við ef þarf: litur, litareinkenni, fóstramóðir, atburðir, vorfall og athugasemdir.
- Ýttu á „Vista lamb 1“. Næsta lamb opnast, „Skrá lamb 2 af 2“.
- Þegar öll lömbin eru skráð ýtirðu á „Ljúka skráningu“. Það stendur „2 lömb skráð!“ og skjárinn er tilbúinn fyrir næstu á.
Gott að skilja
Senda eða bíða
Efst á hverjum burði er valið Fjárvís: Senda / Bíða.
- Senda (sjálfgefið): burðurinn fer með næst þegar þú sendir í Fjárvís.
- Bíða: burðurinn er geymdur í LAMB og fer ekki með. Notaðu það ef eitthvað er óvíst, t.d. hvort lamb lifir eða hvaða á á lambið. Breyttu svo í Senda þegar það er komið á hreint.
Gott að skilja
Athugasemdir
Athugasemd má skrifa bæði á burðinn og á hvert lamb. Hún er valfrjáls og hreinsast eftir hverja vistun. Athugasemdirnar eru geymdar í LAMB og fylgja ánni og lambinu. Þær birtast sem Fyrri athugasemdir næst þegar gripurinn er valinn, t.d. við haustvigtun.
Senda
Burðurinn fer ekki sjálfur í Fjárvís. Þegar þú ert búin/n, t.d. í lok dags, sendir þú allt í einu.
- Komdu símanum á net og opnaðu listann Burðaskráning.
- Kláraðu burði merkta „Vantar … lömb“ fyrst. Ýttu á burðinn til að bæta þeim við.
- Ýttu á „Senda til Fjárvís“. Fyrsta skiptið skráir þú þig inn í Fjárvís.
- Svo kemur yfirlitið: hve margt var skráð eða hafnað.
Þú getur líka sent af vefnum: Burðalisti → Ósent → „Senda á Fjárvís“.
Ef eitthvað stoppar þig
Skilaboð sem geta birst
Það vantar ána eða niðurstöðuna. Hvort tveggja er skylda.
Lambsnúmer og kyn eru skylda á hverju lambi.
Færri lömb skráð en fjöldinn segir. Ýttu á burðinn í listanum og bættu við, eða lagaðu fjöldann.
Merkið var ekki tekið frá. Skrifaðu númerið sjálf/ur, eða taktu frá merki fyrir næstu lömb, sjá leiðbeiningu 7.
Yfirlitið segir af hverju. Lagaðu burðinn í listanum og sendu aftur.