Ósamræmi við Fjárvís¶
Undir Reikningar og stillingar → bújörðin þín finnur þú spjaldið Ósamræmi við Fjárvís. Það opnar síðu sem ber saman það sem LAMB hefur um búið og það sem Fjárvís hefur — í báðar áttir — og telur upp það sem stemmir ekki, með ástæðu við hverja línu.
Samanburðurinn er keyrður á hverri nóttu fyrir bú með LAMB-reikning. Efst á síðunni stendur hvaða nótt hann er frá og hvenær búið var síðast samstillt. „Ekkert ósamræmi" þýðir því ekkert ósamræmi í nótt — ekki „aldrei athugað".
Þrír flipar¶
| Flipi | Hvað er þar | Hvað gerir þú |
|---|---|---|
| Í appinu, ekki í Fjárvís | Skráningar sem urðu til í LAMB — vigtanir, burðir, fang, fósturtalningar, frátekin örmerki, breytingar á grip — sem aldrei komust til Fjárvís: aldrei sendar, Fjárvís hafnaði þeim, eða Fjárvís hefur eytt færslunni sem appið vísar á. | Opnaðu skrána (hnappurinn Opna skrá) og sendu, lagaðu eða láttu vera. Þú ákveður. |
| Ber ekki saman | Sama skráning á báðum stöðum með ólíku gildi: þungi, dagsetning, fjöldi lamba, hrútur … Sýnt sem gildið í LAMB → gildið í Fjárvís. Hér lendir líka gripur sem appið sýnir lifandi en Fjárvís skráir dánardag á. | Athugaðu hvort er rétt. Fjárvís námundar þunga að heilu kílói — hálft kíló til eða frá er ekki talið ósamræmi. |
| Í Fjárvís, ekki í appinu | Færslur sem Fjárvís hefur en appið ekki, þótt búið hafi verið samstillt eftir að þær urðu til. | Samstilltu búið. Ef þær koma samt ekki inn, láttu okkur vita — það er villa okkar megin. |
„Bíður samstillingar"¶
Færslur sem voru skráðar eða þeim breytt í Fjárvís eftir síðustu samstillingu eru ekki taldar upp — þær eiga eitt svar, Samstilla núna, og listi yfir 500 vigtanir úr réttum myndi kaffæra þau fáu atriði sem samstilling lagar ekki. Fjöldinn stendur í gula borðanum efst og skiptist eftir tegund.
Hvernig er parað?¶
- Vigtanir, fang og fósturtalningar: á númeri færslunnar í Fjárvís, sem appið geymir þegar það sækir eða sendir.
- Burðir: ær + burðardagur (± 1 dagur), því appið hefur ekkert Fjárvís-númer fyrir burð.
- Frátekin örmerki: á tölustöfum merkisins.
- Gripir: á gripanúmeri. Gripur sem Fjárvís skráir á annað bú er sagður á öðru búi, ekki ekki til.
Dauðir gripir eru ekki bornir saman færslu fyrir færslu — appið sækir aðeins lifandi gripi úr Fjárvís, svo gömul færsla á dauðum grip er ekki ósamræmi heldur hönnun.
Hvað er ekki gert¶
Síðan lagar ekkert sjálf. Hún bendir; þú ákveður. Sendingar og endursendingar eru á sínum stað í skránum (sjá Þungavigtun, Burðaskráning, Forskrá örmerki).